ग्रामीण महिलाको १४ घन्टा घरायसी काममा

house hold

 

काठमाडौँ । ग्रामीण भेगका महिलाले घरायसी काममा झन्डै १४ घन्टा व्यतीत गर्ने गरेको एक अध्ययनले देखाएको छ ।

अक्सफाम नेपालले यहाँ आज आयोजना गरेको ‘घरायसी काम र ज्यालादारी कामबीचको असमानता’ विषयको एक कार्यशालामा प्रस्तुत अध्ययन प्रतिवेदनमा घरायसी कामलाई कामका रुपमा नहेर्ने प्रवृत्तिको अन्त्य आवश्यक रहेको उल्लेख छ ।

इन्टिच्युट अफ डेभलपमेन्ट स्टडिस (आइडिएस) र इन्स्टिच्युट अफ सोसियल स्टडी ट्रस्ट(आइएसटी)ले कर्णाली खाद्यान्न कार्यक्रमअन्तर्गत जुम्ला जिल्लामा र उद्यम विकास कार्यक्रमअन्तर्गत सुर्खेतमा गरेको अध्ययनका आधारमा सो प्रतिवेदन तयार पारिएको हो ।

सरकारले लागू गरेको कर्णाली रोजगार कार्यक्रम र अक्सफाम नेपालले लागू गरेको उद्यम विकास कार्यक्रमका आधारमा महिलासँगको छलफल र अन्तर्वार्ताका आधारमा सो प्रतिवेदन तयार पारिएको अक्सफामकी प्रतिनिधि रस्ना ढकालले जानकारी दिनुभयो ।

घरभित्र र बाहिर दुवै ठाउँमा श्रम गर्नुपर्दाको अवस्था, समाधानका उपाय तथा सरकार र गैरसरकारी क्षेत्रले गर्नसक्ने पहलको विषयसमेत प्रतिवेदनमा औँल्याइएको छ ।

महिलाको दोहोरो भूमिकाको पहिचान, दोहोरो भूमिका घटाउने उपाय र कामको पुनः वितरण कसरी गर्ने भन्नेमा अध्ययन केन्द्रित रहेको छ । रासस