ठेकेदारकै कारण मेलम्चीको पानी काठमाडौं ल्याउन ढिलाई

9,929
खानेपानी मन्त्रालयका सचिव कृष्णराज बीसी

 

काठमाडौं, १९ जेठ । मेलम्ची खानेपानी आयोजनाको सुरुङमार्ग निर्माणको जिम्मेवारी पाएको इटालियन निर्माता कम्पनी सिएमसी दि रेभेनाको आलटालका कारण निर्धारित समयमा मेलम्चीको पानी काठमाडौं ल्याउनमा ढिलाई हुने देखिएको छ । ठेकेदार कम्पनीले आयोजनाको काममा आलटाल गरेपछि आयोजनाको काम पछि धकेलिएको छ ।

ठेकेदार कम्पनीले काममा लापरवाही गर्न थालेपछि शुक्रबार खानेपानी मन्त्रालयमा पत्रकार सम्मेलन गरी भनेको समयमा काम नगरे ठेकेदार कम्पनीलाई कारबाही गर्ने सम्मको चेतावनी दिइएको छ । खानेपानी सचिव कृष्णराज बिसीले नेपालस्थित कम्पनीका प्रतिनिधीले आयोजना निर्माणको काम समयमै सक्ने भनेर प्रतिबद्धता जनाउने तर निर्धारित समयमा काम नगर्ने समस्या आएको बताउनु भयो । उहाँले आयोजनास्थलमा प्रतिबद्धता अनुसार काम नभएको भन्दै सिएमसी दि रेभेनाको इटलीस्थित मुख्य कार्यालयलाई पत्र लेखेर उच्च प्रतिनिधीलाई नेपाल बोलाएर गम्भिर ढंगले छलफल गर्ने योजना बनाएको बताउनु भयो ।

‘उक्त छलफलबाट समेत ठेकेदार पक्ष गम्भिर नभई काम अघि नबढाए सम्झौता उल्लंघन गरेको मानेर जुनसुकै प्रकारको कदम चाल्ने’ मन्त्रालयको योजना रहेको सचिव बिसीले बताउनु भयो । ठेकेदार कम्पनीसँग गम्भिर ढंगले छलफल गरेर काम अघि बढाई आगामी दशैंसम्म काठमाडौंमा पानी झार्ने मन्त्रालयले उद्देश्य लिएको छ तर ठेकेदार कम्पनीले काममा आलटाल गरे सो कम्पनीसँग ठेक्का रद्द गर्ने सरकारको तयारी छ । कम्पनीले प्रतिबद्धता जनाउने तर काम नगर्ने प्रवृतिबाट मन्त्रालय आश्चर्यमा परेको सचिव बिसिले बताउनु भयो ।

मन्त्रालयले प्रतिवद्धता बमोजिम काम नगरेकोमा ठेकेदारसँग सपष्टिकरण समेत लिएको जनाएको छ । मन्त्रालयले आगामी साउन ३० गते मेलम्चीको पानी काठमाडौमा झार्ने लक्ष्य लिएको छ ।

Leave A Reply

Your email address will not be published.